පින්වත, සියලු සංස්කාරයෝ ලෝභ, ද්වේශ, මෝහයන්ට බර වෙන කොට, සංස්කාරයෝ හේතුවෙන් සකස් වන විඤ්ඤාණයේ මැජික් සන්දර්ශනයෝ හරිම සංකීර්ණ වෙනවා. පින්වත, ඔබ පසුගියදා මෙතෙක් නොදැක්ක නව මාදිලියේ විඤ්ඤාණයේ මැජික් සන්දර්ශනයක්, මත්ද්රව්ය සහ පැවිදි පක්ෂය අතර දැක්කා නේද? පින්වත, දුශ්ශීලභාවයට පිළියම් නොකළොත් මීටත් වඩා හද කම්පා වෙන විඤ්ඤාණයේ මැජික් සන්දර්ශනයෝ අනාගතයේ දී සමාජගත වේවි. පින්වත, මෙවැනි සිද්ධීන් තුළින් පුද්ගල සඤ්ඤාවෝ බැහැර කරලා හේතුඵල ධර්මයෝ නුවණින් දකින්න. පින්වත, මෙය සටහන් තබන භික්ෂුව උතුම් තෙරුවන්ට අකීකරු වී, උතුම් ප්රාතිමෝක්ෂ ශීලය නොවටිනා දෙයක් හැටියට දැක්කා නම්, භික්ෂුවත් ගුවන් තොටුපොළේ දී රේගුවට හසු වූ පැවිදි කණ්ඩායමේ ඉන්න තිබුණා. පින්වත, අපි හැමෝම අවිද්යාව ඉදිරියේ අසරණයි; තෘෂ්ණාව ඉදිරියේ අන්ධයි. පින්වත, මෙවැනි සිදුවීම්වල දී අපේ ඉලක්කය විය යුත්තේ අවිද්යාවේ වියරුභාවයයි; අවිද්යාවෙන් උපදින තෘෂ්ණාවේ නොසෑහීමයි. පින්වත, අසත්පුරුෂ ආශ්රය, අසද්ධර්ම ශ්රවණය සහ අනුවණින් මෙනෙහි කිරීම ඉහත වැරදිවල සැබෑම විත්තිකරුවායි. පින්වත, අපි මේ දකින්නේ දුර්වල ශීලය උපයෝගී කොට ගෙන කාමයේ සහ රූපයේ කෙටි ආස්වාදය විසින් නිරුවත් කළ අවිද්යාවේ සැබෑම දුකේ හැඩරුවයි. පින්වත, වැරදිකරුවනට ගල් ගැසීම පසෙක තබා, සිල්වත් සමාජයක් උදෙසා ජාතිය අවදි කරමු. පින්වත, කාලා, බීලා, කම්සැප විඳලා, විනෝද වෙලා, වයෝවෘද්ධ කාලයේ දී අසිහියෙන් නන්දොඩවලා මරණින් පසු සතර අපායට වැටෙන පව්කාර ජීවන චර්යාවන්ගෙන් අපි වහ වහා මිදෙමු.
පින්වත, භික්ෂු සමාජයේ දුශ්ශීලභාවය යැයි කියන්නේ අලුත උපන් දරුවෙක් නොවේ. පින්වත, බුදුරජාණන් වහන්සේ ජීවමානව වැඩ සිටිය දී, විනය කාරණාවන් දෙසිය විස්සක් සහිත උතුම් ප්රාතිමෝක්ෂ ශීලය පනවන්නේ භික්ෂු සමාජය තුළ චතුරාර්ය සත්යය කෙරෙහි සිහිනුවණ දුර්වල වී දුසිල්වත්භාවයන් උපන් නිසා මයි. පින්වත, බුදුරජාණන් වහන්සේ ජීවමානව වැඩ සිටියදීත් උතුම් ප්රාතිමෝක්ෂ ශීලයට ගරු නොකළ, අධිකරණයන් නොසලකා හැරිය භික්ෂූන් කොතෙක් නම් සිටියා ද? පින්වත, උතුම් ශීලයට ගරුත්වයක් ලබා දෙන්න නම්, අපි තුළ සම්මා දිට්ඨි සහ සම්මා සංකප්පයෝ හොඳින් වැඩෙන්නට ඕනේ. පින්වත, සම්මා දිට්ඨි සහ සම්මා සංකප්පයෝ අපි තුළ අර්ථවත්ව වැඩෙන්න නම්, කල්යාණමිත්ර ආශ්රය, සද්ධර්ම ශ්රවණය, නුවණින් මෙනෙහි කිරීමේ ක්රියාන්විතයට අපේ ජීවිත අපි පූජා කරන්න ඕනේ. පින්වත, මේ සියල්ල දුර්වල වූ තැන බිහි වන්නේ මිච්ඡා පැවිද්දෙක්. පින්වත, අනාගතයේ දවසක් එනවා, මේ උතුම් චතුරාර්ය සත්යය ධර්මයෝ අතුරුදන් වෙලා, මහා සංඝ රත්නය කියන අර්ථය ලෝකයෙන් අතුරුදන් වෙලා යන. පින්වත, එදාට සම්මා පැවිද්ද ලෝකය තුළ නැහැ. එදාට තිබෙන්නේ උතුම් තෙරුවන් අතුරුදන් වූ මිච්ඡා පැවිද්දයි. පින්වත, ලෝකය කැඩෙනවා, බිඳෙනවා, විසිරෙනවා. පින්වත, මේ ලෝක ස්වභාවය නවත්වන්න පුළුවන් ජගතෙක් ලෝකය කියන අර්ථය තුළ නැහැ. පින්වත, ලෝකයාට චතුරාර්ය සත්යය ධර්මයන්ගෙන් ආදර්ශයක් වෙලා, පූර්වාදර්ශයක් වෙලා කැඩෙන, බිඳෙන, විසිරෙන ලෝකය කැමති කෙනෙකුට භුක්ති විඳින්න කියලා ඔබ ලෝකයෙන් නිවී යන්න.
පින්වත, ලෝකය යැයි කියන්නේ සංස්කාර හේතුවෙන් සකස් වන විඤ්ඤාණයේ රඟමඬලක්. පින්වත, අවිද්යාවේ මව්කුසෙන් කාලයෙන් කාලයට අලුත් අලුත් නළු නිළියන් රඟමඬලේ පහළ වෙනවා. පින්වත, වැඩිහිටි ස්වාමීන් වහන්සේ නමක් භික්ෂුවට කියනවා, “උසස් අධ්යාපනය ලබන සමහර තරුණ හාමුදුරුවරු ගමේ ගිහි දායක පින්වතුන්ලාට අනුශාසනා කරනව ලු, බුද්ධ පූජාව තියන්න එපා. මල්, පහන්, ගිලන්පස පූජා කරන්න එපා. මේවා බොරු වැඩ” ය කියලා. පින්වත, මේ ඔබ දකින්නේ මිථ්යා දෘෂ්ටික දේශපාලන මතවාදී සංස්කාරයෝ හේතුවෙන් සකස් වන විඤ්ඤාණ රඟමඬලේ අලුත් අලුත් නළු නිළියෝයි. පින්වත, භික්ෂුව බොහෝම විවෘතව සටහන් තබනවා, “රටක ජාතික, ආධ්යාත්මික වටිනාකම් සහ ජනතාවගේ කුසල් සිත් දුර්වල කොට දමන නායකයන් ජාතියට පළිබෝධයක්” ය කියලා. පින්වත, ජාතියේ කුසල් සිත් දුර්වල කොට දමා, රටක ආර්ථික සෞභාග්යයක් බලාපොරොත්තු වීම, දහවල් දකින සිහිනයක් ම වෙනවා. පින්වත, වැරදි කරන ගිහි සහ පැවිදි දෙපාර්ශ්වය තුළින් ම අපි තවමත් දකින්නේ කාමයේ සහ රූපයේ කෙටි ආස්වාදයයි. පින්වත, අපි කවදා ද, වැරදි කරන ගිහි සහ පැවිදි දෙපාර්ශ්වය තුළින් ම චතුරාර්ය සත්යය ධර්මයෝ දකින්නේ? පින්වත, පසුගියදා කටුනායක ගුවන් තොටපොළේ දී අත්අඩංගුවට පත් පැවිදි පින්වතුන්ලාගේ සිද්ධිය දැකලා, අසලා, සිතලා මොනතරම් නම් කාමයේ සහ රූපයේ කෙටි ආස්වාදයක් ඔබ ලැබුවා ද? පින්වත, එහි තිබුණේ ඇලීම් සහ ගැටීම් පමණක් ම නේද? පින්වත, අදාළ පැවිදි පින්වතුන්ලා වරදට යොමු කළ තෘෂ්ණාවේ වියරු මාර ධර්මයෝ, කාමයේ සහ රූපයේ කෙටි ආස්වාදයට ප්රණීත ආහාරයක් වී, යළිත් අපිට අමතක වෙලා යාවි.
පින්වත, සමාජගත වන ගිහි සහ පැවිදි මිථ්යා දෘෂ්ටික විඤ්ඤාණයේ මැජික් සන්දර්ශන ඉදිරියේ, විඤ්ඤාණ රඟමඬලේ රඟන අලුත් අලුත් ගිහි සහ පැවිදි නළු නිළියන් දකිද්දී, පින්වත් කල්යාණමිත්ර ආශ්රය ලබන ඔබ, මේ කල එළි බහින ශෝක, පරිදේව, දුක්ඛ, දෝමනස්සයන්ට සහ ප්රියයන් අප්රියයන් බවට පත් වීමේ දුකට එකම ධර්මානුකූල හේතුව “තෘෂ්ණාව” යැයි ඔබ දැක්කා ද? පින්වත, වරදකරුවන් හිරේ දැම්මා කියලා ප්රශ්නය විසඳෙන්නේ නැහැ. පින්වත, වැරදි මත සුදු හුණු තැවරුවාය කියලත් ප්රශ්නය විසඳෙන්නේ නැහැ. පින්වත, තව තවත් තෘෂ්ණාව ඔඩු දුවනවා පමණක් මයි. පින්වත, උපසම්පදා භික්ෂුවක් චේතනාන්විතව සොරකමක් සිදු කළොත් එම භික්ෂුව, භික්ෂූත්වයෙන් පාරාජිකා වෙනවා. පින්වත, කරටිය කැඩුණ පොල් ගසක් වගේ, දෙකට පැළුණ කළු ගලක් වගේ යළි සංඝ සමාජයට පෑහෙන්නේ නැහැ යැයි විනය ධර්මයන්ගේ සඳහන් වෙනවා. පින්වත, තෘෂ්ණාව මොනතරම් නම් මාර ධර්මයක් ද? උතුම් උපසම්පදාව අහිමි කරනවා. මෙය සටහන් තබන භික්ෂුව ආනන්තරිය පාප කර්මයන්ට මෙහා දකින බලවත් ම අකුසලය සතර පාරාජිකාවෝයි. පින්වත, එම නිසා ම භික්ෂුවගේ සතිය සිහිය සතර පාරාජිකාවෝ කෙරෙහි හරිම තියුණුයි. පින්වත, කල එළි බහින විඤ්ඤාණයේ ගිහි සහ පැවිදි මැජික් සන්දර්ශනයෝ ජාතියට හඬ නගා කියන්නේ, වර්තමානයේ ජාතියට අත්යවශ්ය, තෘෂ්ණාව සියුම් කරන ආර්ය අෂ්ටාංගික මාර්ගයේ පරම පූජනීය ශක්තිය බවයි. පින්වත, පංච නීවරණයෝ අපේ විඳීම් තුළ බඩපිනුම් ගසද්දී, ආර්ය අෂ්ටාංගික මාර්ගය තැළී පොඩි වී යනවා.
පින්වත, සමාජය උතුම් ශීලයට වටිනාකමක් නොදෙනවා නම්, පින්වත, “අපි සිල්වත් වෙමු.” පින්වත, ශීලයෙන් ලැබෙන උතුම් ආනිශංසයෝ තුළින් අපි ශක්තිමත් වෙමු. පින්වත, එසේ නොවුණොත් දුශ්ශීලභාවයේ බර වැඩි වී සමාජය වැරදිකරුවන්ගේ තිප්පොළක් වේවි. පින්වත, මීට වසර පහළොවකට පෙරාතුව දුර බැහැර දිස්ත්රික්කයක ආරණ්යක නායක ස්වාමීන් වහන්සේ නමක් භික්ෂුවට කියනවා, ආයුෂ්මතුන්, තායිලන්ත චාරිකාවලින් මේ ප්රදේශයේ ස්වාමීන් වහන්සේලාගෙන් බේරුණේ තමන් වහන්සේ විතරයි කියලා. පින්වත, එම නායක ස්වාමීන් වහන්සේ සමහර නොමිලේ තායිලන්ත චාරිකාවල සිදු කරන අවැඩ ගැන කියූ කරුණු මෙහි සටහන් තබන්න බැහැ. පින්වත, යම් ශාසන විරෝධී කණ්ඩායම් නොමිලේ චාරිකා නාමයෙන් සිදු කරන සංඝ සමාජයේ, විශේෂයෙන් තරුණ ස්වාමීන් වහන්සේලාගේ ශීලය කිලිටි කරන අසත්පුරුෂ මෙහෙයුම්වලට දීර්ඝ අතීතයක් තිබෙනවා. මේවා අද ඊයේ වෙන දේවල් නොවේ. පින්වත, සංස්කාර අධිකරණය සර්ව සාධාරණයි. පින්වත, මේ සංස්කාර අධිකරණය තීන්දු තීරණ දෙන්නේ වැරදි කළ සහ වැරදි නොකළ සියල්ලන්ගේ හෘද සාක්ෂිය තුළින් මයි. පින්වත, රූප, වේදනා, සඤ්ඤා, සංස්කාර, විඤ්ඤාණයෝ හෘද සාක්ෂියේ විනිසුරු මඩුල්ලයි. පින්වත, “මේ උතුම් සම්මා සම්බුද්ධ චීවරය නිරාගමිකභාවය උදෙසා, මිථ්යා දෘෂ්ටිකභාවය ප්රවර්ධනය උදෙසා යමෙක් උපයෝගී කොට ගනී ද, ඔහු වද මල් මාලා පළන්දා, වධක බෙර හඬවා, රාජ අණින් හිස ගසා දමන්න රැගෙන යන යම් මනුෂ්යයෙක්, යම් තියුණු දුකක්, ශෝකයක් විඳී ද, ඊටත් වඩා වියරු දුකක් සතර අපායන්ට වැටී විඳිනවා” ය කියලා ධර්මයේ සඳහන් වෙනවා.
පින්වත, මේ ලෝක ධාතුවේ දුර්ලභ ම අර්ථය උතුම් ලොව්තුරා බුදුරජාණන් වහන්සේයි. පින්වත, දෙවෙනි සහ තෙවෙනි දුර්ලභ අර්ථයෝ වෙන්නේ උතුම් චතුරාර්ය සත්යය ධර්මයෝ සහ උතුම් ආර්ය මහා සංඝ රත්නයයි. පින්වත, මේ උතුම් අර්ථයෝ ලෝකයට බිහි වෙන්නේ උතුම් දසපාරමී පුණ්ය ධර්මයන්ගේ ශක්තියෙන්. පින්වත, මේ උතුම් ශක්තියට දෙවෙනි වෙන්නේ පංචශීලයෙන් ලොව දිග්විජය කරන සහ උතුම් උපෝසථ ශීලයෙන් තම රාජකීය ජවය මතු කොට ගන්නා සක්විති රජ තනතුරයි. පින්වත, ලෞකික කාම සම්පත්වල රජු වන ඔහු, සම්මා ඥාන සහ සම්මා විමුක්තිය ඉදිරියේ ප්රමාදී චරිතයක් වෙනවා. පින්වත, සක්විති රජ පදවියත්, සම්මා ඥාන සහ සම්මා විමුක්තිය ඉදිරියේ ප්රමාදී චරිතයක් නම්, බලය ඉදිරියේ තම හෘද සාක්ෂිය විකෘතියක් කොට ගන්නා ලෝකයේ වර්තමාන “ඡන්ද” බලවතුන්ගෙන් කිනම් ප්රඥාවක් අපි බලාපොරොත්තු වෙන්න ද? පින්වත, බලය අයිති මාරයාට නිසා ම, බලය පසුපස කාමච්ඡන්ද ආදි වූ පංච නීවරණයෝ පිරිවර සහිතව ආධිපත්යය පතුරුවනවා. පින්වත, බලය පංච නීවරණයන්ගේ ග්රහණයෙන් මත් වන නිසා ම, උතුම් සප්ත බොජ්ඣංගයන්ගෙන් සැහැල්ලු වන සද්ධර්මයට, බලය ප්රියමනාප නැහැ. පින්වත, බලය නමැති පංච නීවරණ දාම් ලෑල්ලේ, තම උවමනා එපාකම් වෙනුවෙන් එහා මෙහා අදින ඉත්තෙක් බවට උතුම් ශාසන අර්ථයන් පත් කොට ගන්න හොඳ නැහැ. පින්වත, තෙරුවන් කෙරෙහි ශ්රද්ධාවට ගරු නොකර උත්තරීතර තෙමඟුල පංච නීවරණ මැයි දිනයක් වෙනුවෙන් එහාට මෙහාට ඇදීම පුද්ගල සඤ්ඤාවන්ගෙන් නොව පංච නීවරණයන්ගේ ප්රණීත විසිතුරු චේතනාවෝ ම බව, සිහිනුවණින් තේරුම් ගන්න. පින්වත, අධර්මයෝ පෙරළා අධර්මයන්ට මයි පාර පෙන්වන්නේ.
අතිපූජනීය රාජගිරියේ අරියඥාන ස්වාමින්වහන්සේ.
උපුටා ගැනීම – 2026 මැයි 10 ඉරිදා දිවයින පුවත්පතින්.
